[الطرقات]
في الكبد ليعاتها وفي النفس حاجات
حاجات ماهيب رغبات وشهـوات
ندم على حزن على مدري شسمه
اللـي يكلمـك وتكلمـه بسـكـات
ياودي اصرخ من اللي داخلي حيل
وياودي ماتنبس من الليعـه شفـات
مزحوم تفكير ومشـوش وبـردان
وياخوفي من الغضب والانفعـالات
تعـارك الشـر والخيـر فيـنـي
يأثـر علـى اتخـاذي للـقـرارت
ثاقب وألاحظ تفاصيـل التفاصيـل
كن البشر عري وعيونـي مرايـات
أفضال ربي علي واجـد وأفضـل
أفضال ربي علي الفقر وأنكارة الذات
يامجمل الفقـر وأشيـاءه وروحـه
تموت منه تعب وتعيشـه ازمـات
يعلمـك ضعفـك وبـأن عقـلـك
هو اللـي يميـزك عـن الحشـرات
وتعرف بأن هذا لـك وذا لغيـرك
ولاتفكّر ولاتكسّر حسابات
الفقر مفيد ..وأشياءه مفيده
مليء قناعه وقوه وغايات
يمكن لو إنك غني تطغا وتنسى
وأتطيش وتطوّف الخمس صلوات
لذلك الحمد لله والثنى له
على الفقر والمصايب والمسرات
يمكن أني فقير بس مانيب تبعّي
أجلس ولا أنقاد خلف الإتجاهات
وإن ما أعجبتني قناعات الزمن هذا
أنا.. أألف لتفكيري قناعات
شاعر ويسكن فـ مخي ألف شاعر
ماهم بشعّار هالوقت التروفات
اللي يقولون مافي الشعر نادر
وإن الشعراء نفس المستويات
لو أنهم واحد وبتفكير واحد
ماشفت ناقد ولا معجب وشمات
الله على هالكلام ومن يقوله
والله يقطع سياسة هالمجلات
يعني اللي شعره ملى الدنيا جماهير
مثل اللي يطلق قصيده سردة أبيات
لامن سمعت القصيده قلت هذي؟
سمعتها قبل هذي عشر مرات!!
يشل.. آخر كلام الشطر الأول
ويحطه بآخر الثاني .. وخذ هات
قاف متكرر.. ولافكره ولاشي
يبني القصيده.. على تفكير بنات
وبه نوع ساذج علشان أيتميّـز
يصرخ ويعمل بيدّينه حركات
والمرء عود مايجهل.. لذلك
هالشعراء يكرهوني -أنا- بالذات
الله يخليني لشعري وأصونه
وأحرق به كبود شعّار المسجات
أجذبّ به.. أذواق حكّام الجزيرة
وأزرعه.. فعقول فتيان وفتيات
اركبّه جن.. وامارسه بجنون
وأشبعه فلسفات وأبتكارات
وآعلم الجيل هذا وإللي بعده
جودة الإطاله.. وفن الإختصارات
و وشلون أحرث صخر فكري وأخلّي
بيني وبين أقرب منافس مسافات
الشعر في نظرة اغلبهم مصالح
فلوس وشيوخ وبنات ولقاءات
وفي نظرتي الشعر روحٍ و روح حرّه
ماتخضع لشف.. وأشخاص.. وقياسات
الشعرٌ ماتقشعرُ له الأبدانٌ
ومَا يسَرقُ من الكلمات.. الكلمَات
تقراه فـ عيون شاعره وتحسه
يفتح له فَجلد يدّينك مسامات
ردد قصيدي ياجمهوري وصفق
وعلمّهم إن الغلا ماهو خيارات
تعال نسرح سوّى في شي عندي
وأخاف لا أبكي؟ وتبكيني العبارات
حزين جداً ومتعومس وخايف
أحس كنّي على مهوّي نهايات
حبيبتي .. إللي أغليها وأبيها؟
راحت.. وقالت بجّي وللحين ماجات
ما أذكر أني.. مسوي شي لكن
الحب لا زاد.. يسبب حزازات
والصبر صبر القلوب البيض وأدري
يامصعب الصبر لا قدّ به محاتات
دمّرني الشوق وإستنرفني شعور
وتعبت أثبت وجودي داخل شتات
تمر كل الوجيه.. بدرب عيني
نفس الملامح؟.. ونفس الإبتسامات
حبيبتي طاغيه وبشكل طاغي
صديقة الليل واجناب البنايات
من وين ما أفتر لاهذا وجهها
على الطرقات وأضواء السيارات
يابرّي حالي عليها برّي حالي
عليها يابرّي حالي عشر بريات
لأني أحبها.. فعلاً وجداً
ماهي محبة.. رفث.. ولا إتصالات
أحس كني أبوها أو أخوها
أدرى عليها من العالم مدارات
وإللي سواتي.. يحب وخايف الله
يعرف.. معنى معاناة المعانات
الحزن في بعض الأحيّان إزدواجي
وجميل.. إذا صار من تجنيب غلطات
من خّلا حاجه لربي عاضه أخيّر
منها واحسن دبلات الدبلات
وانا مابي .. غيرها .. ولا ألتفت له
السيده .. لا رجعنا للسيادات
جعل أمها إتوافق إن جيت أخطبها
تكفون دعواتكم يـ أهل الدعوات
[الجرح]
الجرح ماهو خاطر شوي ويروق
الجرح حتى لو تشافى يعللك
**
واذاك متحمس متاهات وطروق
انا تعبت اشد حيلي واحاولك
سماي ما شيّ شمس ورعود وبروق
والريح ماهبت ولايجري الفلك
**
والقلب ناشف بحر وشقوقه شقوق
وشلون بيكوّن سحاب ويبللك
**
يا ضامي انا الضما ومتشبع حروق
واذاك ضامي للمواصل .. انا هلك!!
**
هلك ووقف في وجهي الاصل والذوق
والمجتمع والعرف والفقر واهلك
**
متعومس وحزن النبلاء مرموق
يعني لو احتاج الك ماجيتك اسألك
**
اللي علي اشكي واعاتبك برفوق
واقولك ودي ماعاد اتأملك
**
من دورة الايام ياخوك مخنوق
الوقت مشاني من السلك لسلك
**
ازل خطوه .. بس ما ازل منطوق
ولو صارت ابحب خشمك واجاملك
**
يبقى البني ادم مجرد ومخلوق
ملك ولكن في الحقيقه بلا ملك
**
كذاب.. قايل كل مطرود ملحوق
سنيييين وانا اطردك وازريت لا اوصلك
**
كنك تطيش وكني ادور في طوق
كل ما وصلت اخرك يطلعلي اولك
**
ليت مافي خاطري شوق وحروق
ماكان حسيت ان انا بس منك والك
**
الشوق ماهو رعشه وقبضة عروق
وماهو اللي من شينك فعينك يجملك
**
وماهو شعور ياخالق الروح برفوق
وماهو سحر ولا ادري والله شقول الك
**
انا سحابة حلم وتطير بك فوق
وتطير ولا ودك انها تنزلك
**
الشوق هذا .. والا انا شوقي البوق
ماقد حصل في شوق هذي ولا تلك
**
تدري وش اسوي ليا اضناني الشوق
اسوي بعيوني كذا واتخيلك
**
واقربك واتوق واتوق واتوق
واكثرك واحلف ماعاد اقللك
**
واصورك في الموق وتكبر على الموق
وتطيح مع دمعي على ايدي واقبلك
**
هذا غلاي اللي مع الدم مدقوق
ولا عاد تسأل عن شعوري وازعلك
**
محبة ماهيب من طارف السوق
لو انك توكل.. كان والله لاكلك
**
جيتك حقوق ورحت ماعندي حقوق
وان قلت ما احبك ابجحد مواصلك
**
احبك .. الا يا بري حالي وعوق
من كثر ما احبك اخاف اني اقتلك
[مها]
اخر حركات التدلع والغنا
اللي اسمها(مها)وفي الدلع(مهاو)
فرفوره تسلف الشمس السنا
مغويه ويطرد وراها كل غاو
ان وقفت كل شي ماتباعد دنا
وكل شي متلخبط مع الوقفه تساو
واليا مشت؟قال النمل:الله لنا
تقاو ياجوعي على صبري تقاو
ذروة ترف..ذروه غنج..ذروه هنا
جمالها مايستوعب وماينتقاو
في جنبها:نوره,وعبير,ومنى
شباب...وعند البل وكشختهم فراو
مخلوق لامنه انثنى يعني انثنى
كل الزوايا تستقيم اليا تزاو
يابوي شي لايوصف ولا ينجنا
يسبب لك جروح لايمكن تداو
مثال:لاجاعت وطال بها العنا
كل الحلاو اللي على هالارض جاو
هي جايعه؟؟!يارب تاكلني انا!!
هذي سواليف الحلاو...مع الحلاو
واليا كلت اطرف حلاوه من هنا
كل الحلاو يشوفها ويقول((وااو))!!!
[بإنتظارك]
كل حاجه يانبيله فـــ نتظارك
الوطن والناس وآ نا فــ نتظارك
والطريق العام والباب الرئيسي .. والممر وقبضه السلم ..
ودارك ....؟
كل أبونا .. يانبيله فـــ نتظارك .......
&&&
لو تشوفيني شلون أ مشي ويديني فــ جيبي
وأنا... وأحزاني وطيبي ... كان ماخذيتي قرارك
كان مارحتي ولاقلتي تري .. منت بحبـــيبي
يـاخســارة قلبي المظلومـ ولا... ياإنتـصـاركـ
&&&
رحتي وخذتي معاك ابسط تفاصيل الحياة
يامزعلة البنات ...
سحقاً لكل البنات
انا ميت فيك ... ايش ميت فيك ؟
انتي فيك حتي الموت .... مات ...
ياجنونك ... ياأ نتشارك
&&&
مري فـ شارعك الاول يالغلا الاول وطوفي
بس شوفي ..
من وقف علي عيونه فــ نتظارك
من بعد ماخنتي وخانو كثير احباب يوفي
هـــم هـــم ...
رابطة جمهورك المتعصب لــ طلة نهارك
انا .. وطيور القفص..والباب .. واشجارك.. وجارك
انتي ام الحسن وام العاطفه واحنا صغارك
فــ لاتلومينا ليامنا وقفنا فــ انتظارك....
&&&
اطغي اطغي . . خلي الغابات تتسلف خضارك
بس تترك اصفرارك ..
لــ ابتسامات المجامل ولــ وقارك
واتركي لعشاقك الموتى حمارك
او بالاحرى ... احمرارك
&&&
لاتلومينا مجانينك نحبك طغيتي
لازعلتي .. لاحكيتي .. ولامشيتي
انتي مسكينه ومظلومه ومعذوره ليامنك نسيتي
لانك انتي اللي فقط...
ماشفتي نفسك لاحكيتي
ولانك انتي الي فقط
ماشفتي نفسك لامشيتي
&&&
يادمــارك
ياوقوف العالم الثالث علي شرفة زرارك
مـــادريــتي ؟
طيب ادري يانبيله كانك الياالحين فعلاً مادريتي ؟
انتي اكبر مشكله تواجه الشعب الكويتي
&&&
انتي مثل الظلم والا جــحــاف بس انتي لئيمه
هم طبيعتهم عدائيين بس انتي رحيمه
مابدر منك منك جريمه
انتي بالفطره بدون سلاح ومقاتل جريمه
وانا بالفطره بدون سلاح احبــــك ياعظيمه ...
بذبوللك وازدهـــارك ... وانصهارك
***
يانبيله انا حالياً ترى ماني سعيد
ماعرف للعيد يوم
وماعرف لليوم ...عيد
غايب وروحي جوارك
انقذيني كل ماوزني نقص حبك يزيد
انقذيني صرت اكلم نفسي ونفسي تعيد
كنا اول فــ نتظارك انا .. وطيور والقفص .. والباب ..واشجارك.. وجارك
كلهم راحو وملوا.. كلهم راحوا وخلوني لحالي فــ نتظارك
انا حاليا وحيد ...
انا حاليا معيد ..
لامزيد.. ولاجديد
الااني اسولف مع الاخ انتظارك
عند دارك ..
علي كرسي انتظارك..
فــ انتظااااااااارك
[الأشجار]
تهب الريح ولا ماتهب الريح يا الاشجار ..انا لازلت اشوفك اثمن الاشياء وأعلاها
لأنك تفرزين الأكسجين الصرف والاثمار ..وحنا نحول افرازك ..خبائث ونتحاشاها
يكبر الفرق من قاع الجحود لقمة الايثار ..ويكثر اشياء نعرفها ولا ندري شمعناها
كليناك ولبسناك وجلسناك وشعلنا النار .. " يفضحي " كم خذينا عمرها ولا شكرناها :")
انا آسف عن الحطاب والحمّال والنجار ..انا آسف على كل الخطايا اللي خطيناها
تأسفت بلسان الشاعر اللي ممتلي ازهار ..يقيس الكائنات بفعلها ماهو ب أسماها
خلقنا الله نكمّل بعضنا فالكون والصرصار ..اكيد ان له فوائد بس حنا ماعرفناها
يجوز انه مفيد اكثر من الثرثار والغدّار ..ومن كم النساء اللي تفاخرها ..ب أعضاها
يبن آدم علاما الفخر والتكبير والاكبار ..ترى اجدادك تحت هالارض هذي اللي انت توطاها
يجي يوم وتكون غبار او احجار او اسوار ..قبل ربي يحشر الناس ويطلّع خفاياها
ويجي يوم اتمنى تكون غصن فعالم الاشجار ..ويجي يوم اتمنى تكونها قبل اتمنّاها
[عصفور]
لأنه عصا .. وفر سمـوه عصفـور
وياكثر عصفـارة كبـار الاسامـي
كل ماتضيق عقول تستاسع صـدور
سنة مـن سنيـن الزمـان الهلامـي
ولا ازداد سعر النفط نتزايـد فجـور
سنة مـن سنيـن الزمـان الهلامـي
ودايم وراعي الحق مهجـا ومحـذور
سنة مـن سنيـن الزمـان الهلامـي
وبيقاله بكره تـرى منـت مجبـور
وباقول للي قالهـا : يـا عظامـي..
الصبـح لو مـا يدحـر الليـل بالنـور
تعيـش عمـرك كلبـوه فظـلامـي
سجل ياتاريخ الشعر أصدق سطـور
أنـا سعـد علـوش والمجـد زامـي
اعيش عيشة فقـر وآمـوت مقبـور
ولا احنـي راسـي وأغيـر كلامـي
شاعر وأقود جيال وأعطـش بحـور
عصامي وشعري سواتـي عصامـي
ماكدبـه علـى نساويـن وبــزور
احفظ مقامه مثل مـا احفـظ مقامـي
ومن قبل حتى اكون شاعر ومخبـور
لي رايـي المطلـق ولـي أهتمامـي
واضح وأمثل خيرة النـاس واثـور
لامـن سمعـت أن التغافـل تسامـي
فـيارب لا تجعلني أسكت على زور
واجعل حسناتي مقاصيـص آثامـي
ولا تفرشنـي علـى كبـد ممـرور
ولا تعرضبـي لـسـان انتقـامـي
لان الحقيقه سـم واظهارهـا جـور
علـى القلـول ام الجهـل والتعامـي
وانا حقيقي فكـر وشعـور وظهـور
ومانيب أجـر كشرتـي وابتسامـي
فـباقولها وبيصير هالقـول مأثـور
مع عـدم شكـري وبالـغ سلامـي
المجتمع غالبـه رجعـي ومغـرور
وفارغ من الدخـل وسـاذج ونامـي
ابناء القبايل وآهـل السيـف والكـور
قتالهـم علـى المسجـات حـامـي
لو هالملايين انفقـت بـر وطهـور
على البنى عـم الجيـاع الضوامـي
ماشفت شحاذيـن وديـون وعثـور
بين القابيـل هـاه ويـن التحامـي؟
صفو يا آخر جيل فالشعـر طابـور
قدامكـم ليـل ووراكـم حـرامـي.
بالـدور بالله اوقفـوا زيـن بالـدور
ويلقي الكوميدي قبل يلقـي الدرامـي
والكل منهي فـي وقوفـه ومأمـور
الوقـت ضيـق والتقـيـد لـزامـي
وماهو مهم يكون لك فكـر وشعـور
أهـم شـي تكـون شاعـر نظامـي
ولافيـه لجنـه ولا فيـه دسـتـور
الاسم سامي طالمـا المسـج سامـي
ياصاحبـي ياشـاعـر يامغـمـور
ماهكـذا تعـرف وتشهـر الاسامـي
شالفايده تصيـر شاعـر و مشهـور
اذا انـت تبعـي موهبـه وانهزامـي
لان اللي يطلب من رعاع العرب شور
ماهـوب اهـل للمعرفـه والتسامـي
ادري بتزعل نـاس وتلـف وتـدور
وبتقوول فيني قول جـارح ودامـي
وبتجي ردود العالم العمـي والعـور
مثل الخريـش اللـي بليـا خطامـي
لكن عزاي اني مع الحـق مسـرور
لو تزعل أخوالـي وتزعـل عمامـي
عن قول كلمة حق مانيـب معـذوور
مبـادىء خلفـي وقبـري أمـامـي
عادي اخسر اصحاب واخسر جمهور
أهم شي اني مـا اخسـر احترامـي.
[خلوها]
خلوها يا اهل الشعر وأخماس وأسـداس
قصيدتـي هــذي خطـيـرة مثـيـره
لله وللتـاريـخ ولـكــل هـالـنـاس
ولهالحـيـاة الـزايـلـة والـمـريـره
وأللي مهـوب لـذروة الفكـر عسّـاس
ينظـم لأصحـاب النفـوس الكسـيـره
الله الأول قـبـل لـفــظ الانـفــاس
عـز وجـل مـن الظنـون الصغـيـره
ما مثـل مثلـه مثـل ولا لـه أجنـاس
يخـلـق مخـلـوق ولا يستـشـيـره
أذل له وانصـاع لـه وأحنـي الـراس
أللـي جعلنـي مـا اعبـد ربٍ غـيـره
عساه يكسوني مـن السنـدس ألبـاس
في يوم يعـرى بـه الأميـر والأميـرة
شاعر وذنبي غيـر وسكوتـي أجـراس
ونفسـي علـى مالله عطاهـا فقـيـره
من كثر ما أعطي حب واخلاص واحساس
أنا ما عـاد أعـرف وشلـون أصيـره
في عقلـي الباطـن عقيـده ونومـاس
وفـي واقعـي خـوف وتـردد وحيـره
هل يا ترى ببني علـى حلمـي أسـاس
أم يـا تـرى ببقـى علـى هالوتيـره؟
والافلاس ماهو أفلاس من حلم الافـلاس
إذا مـا تمـلـك لنفـسـك بصـيـره!
مـا خلـق شـي ٍ إلا بقـدر ومقيـاس
مـا شـي يغلـب شـي أو يستعـيـره
أللي خلق خوف وخلـق ضيقـة ويـاس
خلـق أمـن وأفـراح وحـب وبريـره
لـذلـك الله لا يولـيـنـي أنـجــاس
ويكسونـي بفضلـه ومـنـه وخـيـره
الرب إذا تحتـاج لـه صـرت نبـراس
والإنسان إذا احتاج لـه صـرت أسيـره
والناس ناتـج نـاس استلطفـوا نـاس
أبنـاء رغبـة واستهـامـه وغـيـره
لولا التلاطف وأللي مـا بيـن الأقـواس
مـا شفـت هالعالـم شفوحـه غفيـره
نـدور ويـدور بنـا كــل هـوجـاس
ومـن أجـل ذلـك روسنـا مستديـره
الكـل تايـه فـي مصيـره ومحـتـاس
وماهـوب هـو أللـي يحـدد مصيـره
فيا ليت مـا تنسـى الذواليـق غـراس
ومـا ينسـى مجـرى الميـاه وخريـره
أعلم أللي عـاث مـن بعـد مـا جـاس
تـرى الجهـل راس الأمـور الشريـره
الإنسان لو يملـك مـن الجـن حـراس
أحقـر ذبـابـه قــادره تستثـيـره !
وين الملوك أللي على أقبـاب الافـراس
راحـو وخلـو المغـريـات الكبـيـره
هالأرض ياللي يرجـل النـاس تنـداس
بواقـي ابـن داؤد وابــن المغـيـره
الله يلعـن كــل مـشـرك وخـنّـاس
والله يلـعـن هالحـيـاة القـصـيـره
صغـيّـر الادراك وصغـيّـر الـبـاس
يشـوف كـل النـاس مثلـه صغـيـره
يا قلـب بـرّد كـل مـا هـب نسنـاس
مــا دام هاليمـنـى نـديـه جـديـره
يفـداك مـن رزقـه قتـات وتمـرّاس
لـولا رئتينـه مــا طـلـع زفـيـره
شفـاه مـن طـرد المـلـذات يـبّـاس
وهـو علـى عـد الـرواة وغـديـره
حديثـه فمـا قـال حـمـزه فعـبـاس
مـا حـدّث لمسلـم عـن أبـو هريـره
العمر فرحـه وحـده وعشـرة أتعـاس
ومـن لا يجيـره خالقـه مـن يجيـره
ومن عاش شاف وكـل غبـه بغطّـاس
والصـدق خيـرة مذخرتـه الذخـيـره
كل ما اكتشفت من الأصاحيـب بـلا ّس
أقـول يالله جـعـل فـالأمـر خـيـره
خيره تعرف إن به من أصحابك اخساس
خيـره ولكـن يـا عساهـا الأخـيـره
أقسى جـروح النـاس تغلبـه بنعـاس
مـا يذبـح الإنسـان إلا .. ضمـيـره
بعض البشر مثل ابتسامـات الاعـراس
علـى كثـر ماهـي مثيـره ضـريـره
وحيد ولا عندك مـن النـاس جـلا ّس
أخيـر مـن شـر الـكـلام وسعـيـره
والكل ما يخلـو مـن أخبـاث وادنـاس
في كـل نفـس ٍ هنـاك حاجـه حقيـره
فمن قبل لا سوي مشاكـل مـع النـاس
عنـدي مـع نفسـي مشاكـل كثـيـره
[كل عام وانت بخير]
جمرنـي ابدفـى مـن التجميـر
وبفـرح ولـو النـفـس نـقـاده
ياشهر تسعه جعـل مابـك ظيـر
بـك يـوم ميـعـادي بميـعـاده
جبه وجبني صـب ذايـب ميـر
معـاه خاتـم شــوق وقــلاده
ووجه رسايـل دعـوة وتحذيـر
لشياءنـا الـي غـيـر معـتـاده
لأحلامنا الواجد..عـن التحريـر
وقصـة سجيـن يحـب جـلاده
ووسائـل التشـويـق والتأثـيـر
والشعـر بوصـولـه وبأبـعـاده
والغيم..وزخات المطـر والطيـر
وبخـار فـم الـبـرد وقـنـاده
وسيُـد جنيد...وسيـدة كارتـيـر
وبكـلات ليـلٍ يشقـر اسـواده
والقبعه ... والمعطـف الحريـر
والنادلـه ...والقهـوة الـسـاده
والمرحبـاه الـي لهـا تخـديـر
وقلم .. ودفتر سلـك .. ووسـاده
والنمل .. والنسناس .. والنويـر
وابوعلـي واجــداد اجــداده
وابوعمر ... والسايـس الفقيـر
وجناينـي الشتـلات ابـوغـاده
والصبر ... والفراش ... والتقدير
وبنـات كــل الـحـي وأولاده
في شارعـه يتجمعـون عصيـر
للتهنئـه فــي عـيـد مـيـلاده
ولا خلص التصفيـق والتصفيـر
من كـل مجموعـة طلـع قـاده
وقالـوا رجـاءٍ مانبـي تأخـيـر
ردو ورانـا بــذوق وإجــاده
مع بعض ...كل عام وانت بخيـر
ياغـلا البشـر ياسيـد الـسـاده
تكفى وسامحنـا علـى التقصيـر
والله يـزود بعـمـرك اعـيـاده
وانا اللـي احبـك محبـه غيـر
مـن قلبـي وفــودة افــواده
كل عام وانت بخير وانـا بخيـر
وكل عـام وانـا احبـك بزيـاده
وكل عـام وانـا اكافـح التغييـر
وكل عام ولا انتب علـى العـاده
وكل عام وانـا امـوت التفكيـر
واحـبــك بـإصــرار واراده
وكل عام ودموعي عليـك تحيـر
وهـذي السنـة بالـذات هـداده
وكل عام تكبر بـه تـرد صغيـر
كأنـك تسـوي لوجهـك اعـاده
ياكبدي الـي معـك كبـد بعيـر
مــرددن غـاربـه لـشــداده
وياحـب قلبـي لقلبـك الشريـر
الابيـض الـي عنـاده عـنـاده
سياسـة التوطـيـن والتهجـيـر
ماخـلـت الفقـيـر فـبــلاده
والله وكبرنـا والامـانـي بـيـر
مـصـداره يشـابـه المـيـراده
"سبعة وعشرينك" عساها تصيـر
ميه علـى عـز وعلـى عبـاده
ياحبـي الاول ويــا الاخـيـر
اللـي قديـمـه ورث اجــداده
كل عام وانت بخير وانـا بخيـر
واشيـب وانـا احبـك زيــاده
[الصالحات]
أنا رجل لا يؤمن ببرج الدلو
لا كني أوءمن باحتقاري للبنات
التافهات اللي من العفه خلو
الناعمات الكاسيات العاريات
شعر حلو جسم حلو وجه حلو
لكن وين الباقيات الصالحات
.
.
.
.
.
.
.
معقده لأنها ما تغازل !!
ولانها تؤمن بجدوى العوازل
ولأنها تخاف ربي واهلها
ولأن ماهي سهم طالع ونازل
وانسانه تحس انها شي غالي
وعن هالقناعة مستحيل إتنازل
تنئ باسمها عن كلام المشاميت
وعن الملاحق والقصص والمهازل
تحيتي للي مثلها وللي
تقدر تغازل بس ترفض تغازل
