زمان الصمت - الشاعر بدر بن عبدالمحسن

زمان الصمت - الشاعر بدر بن عبدالمحسن

وترحل .. صرختي تذبل ...
في وادي... لاصدى يوصل ..
ولاباقي أنين ..
زمان الصمت ..
ياعمر الحزن والشكوى ..
ياخطوه ماغدت تقوى...
على الخطوه.. على هم السنين ..
حبيبي .. كتبت اسمك على صوتي ..
كتبته في جدار الوقت ..
على لون السما الهادي ..
على الوادي..
على موتي .. وميلادي..
حبيبي .. لو أيادي الصمت ..
خذتني .. لو ملتني ليل ..
أناعمري ..انتظاري لك ...
لاتحرمنى ... حياتي لك ...

موت وميلاد - الشاعر بدر بن عبدالمحسن

موت وميلاد - الشاعر بدر بن عبدالمحسن

فـ عيني تغيب الشمس .. وتشرق أفـ عيني
في ناظري للشمس ..موتٍ وميلاد
لليل في دمعي سنا .. نجمتيني
وللصبح في جفني شفق هم وسهاد
كن السهر دربٍ عليه اب تجيني
ولاودي اقطع درب لاماك برقاد
ياللي جميع الناس بينك وبيني
وكل لحظةٍ أنا انتظر منك ميعاد
عذري لياسي منك..انك تبيني
خنت الرجا..وان صنت لي عهد ووداد
البسمتك ترخص غوالي سنيني
جرحي يهون وجاير الشوق يزداد
ولمصافحك ربي خلق لي يميني
امدها لك وصل وامدها ابعاد
أنسي عذاب العمر وجروحك اجداد

صعب السؤال - الشاعر بدر بن عبدالمحسن

صعب السؤال - الشاعر بدر بن عبدالمحسن

صعب السؤال ... ليه نفترق
صعب السؤال ... وين نلتقي
انتى الجنوب .. وانا الشمال ..
ومابيننا .. بحر ..ورمال
لكن نحب .. والله نحب .. وفوق الخيال
... صعب السؤال
ياللي اجمل من كلامي عنك واقرب من سكوتي
آه ياطول المسافه بين احساسي وصوتي
ماهو غريب ... انى اسألك
وانتى انا .. كيف اوصلك
لامستحيل .. هذا الرحيل
من يقطع الصمت الطويل
ويـــدلــنــي
قصيدتي .. وين الحروف .. جف القلم
ياضايعه .. ببرد الكفوف .. رعشه الم
قصيدتي ... الا الندم ...الاالندم
بتسافرين .. وانتى معي
قصيدتي ..لاتسمعي .. غيري قصيد
ياساكنه افـ ورق الحشا .. وحبر الوريد

سوالف ليل - الشاعر بدر بن عبدالمحسن

سوالف ليل - الشاعر بدر بن عبدالمحسن

سوالف ليل ..
بجنب المنقد الغافي ..
على حد السهاد ..
تحدثنا في تالي ليل ..
زرعنا سرنا الخافي ..
على شفاه الجمر معنى ..
وخفنا الناس تسمعنى ..
يا انتي

.. لاتوادعنا...
في تالي ليل لاتخافي ..
بنلقى اللي بقي معنا ..
سوالف ليل ..
أو حفنة رماد ...

ضيعت الدليل - الشاعر بدر بن عبدالمحسن

ضيعت الدليل - الشاعر بدر بن عبدالمحسن

كل مااقفيت نادني تعال

وكل مااقبلت عزم بالرحيل

وكل مااجنبت واعدني شمال

يااهل الحب ضيعت الدليل

الحقيقة غدت مثل الخيال

هو عدوي وهو اغلى خليل

شفت انا الظلم من بعض الدلال

يجرح القلب لو كانه جميل

اشهد ان الهوى مابه عدال

هو خلى وانا قلبي عليل

وكل ماقلت له يابن الحلال

المحبة عطا وانت بخيل

التفت لي وهو عجل وقال

لذة الحب في الشىً القليل

لو تغيبي - الشاعر بدر بن عبدالمحسن

لو تغيبي - الشاعر بدر بن عبدالمحسن

لو تغيبي ولو رحل وجهك حبيبي

في غيابي عنك أشوفك .. وفي عذابي منك أشوفك

صدقيني ما نقص هالليل بعدك إلا قمرا

وما فقدت من النهار إلا شعاع الشمس بكرا

واجمل الناس حبيبي .. حبيبي

لو تغيبي لو رحل وجهك حبيبي

تصغر الدنيا وتضيق

كلّ مافي الدنيا أعرفه إلا بيتي والطريق

أنا أحبك ذا نصيبي .. إبعدي عني وغيبي

صدقيني مانقص هالليل بعدك إلا قمرا

ومافقدت من النهار إلا شعاع الشمس بكرا

لك ليالي ما سألتي .. ولي ليالي ما سألت

لو دريت إنك زعلتي .. كان أفرح مازعلت

بس داري مافي قلبك إلا قلبك

واختياري إني أحبك والا أحبك

ومن عذاب الحب يكفي لو تجرّح قلب واحد

وإنتي يا حبي وضعفي لا يهمك كله واحد

لجل تتغير فصول .. ويبكي الغيم في عيوني

وتزهر جبال وسهول .. اضحكي بيّا وبدوني

وصدقيني ما نقص هالليل بعدك إلا قمرا

ومافقدت من النهار إلا شعاع الشمس بكرا

مالي إبل - الشاعر بدر بن عبدالمحسن

مالي إبل - الشاعر بدر بن عبدالمحسن

صوتٍ شبيه الريح

..مشققٍ بأعواد شيح

مرتّق بالدم معتّق بالهم زافر

صوتٍ مثل خضر العروق اللي على ظهر الكفوف المبطيه نافر

صوتٍ ذبيح يصرخ يصيح وابلك خذوه القوم

بين الفزع والنوم

أسرجت إبلي ألف

وسلّيت سيفي ألف

وظهرت تحت الشلف

ماكان في الشارع غير الرصيف والفجر

وبواب جيراني من هالمدى راجع

يحمل رغيفٍ حار

..زاد لثلاث صغار

للمدرسه صحيوا ولبسوا مرايلهم

سنين سنين هالصوت الجارح الزاجر

يصيح بي وينك

..قطفت بساتينك

وابلك خذته القوم..خذته القوم هالابل

أفـّز وفي أنفي عـجاجة الغـاره

وأصحى وفي كفي ساعه ونظاره

مالي إبل أرجـوك مـالي نخيل

..لانصل ولا حـافر

تعبت من صوت العروق المبطيه

..ومن صمتي الفاجر

وأنا أخر الفرّيس ظنك

أنـا أخـر الفرّيـس

حسبك ياحادي العيس

هذا الزمن عاري ..لاردن ولا جوخه

يصهل مهر راكان

وينادي ابن مهيد

يوقف شعر هالبيد

هذا الزمن أصمخ..مايسمع شيوخه

شد الرحال ..سافر

دوّر ياحادي العيس

..روض وزهر ماديس

ولذنوبنا

..لذنوبنا غافر

وداع يا خضر العروق اللي على ظهر الكفوف المبطيه

ويالماضي الحاضر

السراب - الشاعر بدر بن عبدالمحسن

السراب - الشاعر بدر بن عبدالمحسن


قال السراب وقلت ظامي سرابه

قال الهلاك وقلت لعيون الاحباب

يا لايمي في حب مترف شبابه

الموت حق ولاتبرق في الاسباب

كانة ذبحني صاحبي من عذابه

مابي لدمي يا أهل اللوم طلاب

الجادل اللي فية زين ومهابه

تاقف له قلوب وتخضع له أرقاب

في حجر عينة لي غدير وسحابه

وفي وسط قلبي لة تناهيت وعتاب

إن قلت أحبة يكفي القلب مابه

وان قلت أنا مابية..باصير كذاب

إرفع جروحك - الشاعر بدر بن عبدالمحسن

إرفع جروحك - الشاعر بدر بن عبدالمحسن


إرفع جروحك عن وصال الخناجر

نزفك عزيز ومثلك النجم لاطاح

ولاتنحني للريح والذّل فاجر

والخوف ساس الذل والغبن ذبّاح

مادام لك عن خفضة الهام زاجر

إمّا إنكسر ولا تعدّاك الارياح

مانته بعشبٍ نابتٍ وسط حاجر

ولا إنت بشراع التيه والوقت ملاّح

إنت الّذي باسمك تضيق الحناجر

لو إنطقوا بك همس سمعوا بك صياح

تقفي وكن الحرف للحرف هاجر

وتقبل وقلب الصخر بالشعر بوّاح

ولا من رمى صبحك عباة الدياجر

ثم إنتهى ظماه شع بالنور مصباح

إرفع جروحك عن تراب الخناجر

نزفك عزيز ومثلك النجم لاطاح

رسالة - الشاعر بدر بن عبدالمحسن

رسالة - الشاعر بدر بن عبدالمحسن

إلى من .. يهمها أمرى .. إلى من ..
رجاءٍ .. إلى متى صبري .. رجاءٍ
أنا لن .. اشتكي .. همي لغيرك ..
ياروحي ..اشتكي روحي على من
رساله .. حبرها ..دمي ..
رساله ..تصرخ ابهمي ..إلى من ..
سألت الرمل .. في دروب القوافل ..
سألت الجدب .. عن لون السنابل ..
سألت الناس عن وجهك حبيبي ...
عن الشمس .. ومتى تشرق مساءً
أحبك ..يالصحاري اللي ..
فـ هجيرك .. احترق كلي..وفاءً
كتبت لواحة عيونك رسايل ...
بسراب الدمع ... وانفاس القوايل ..
كتبت وذي ترى .. اخر رسالة
أحبك .. وان نسيتيني .. وداعا

يسعد صباحك - الشاعر بدر بن عبدالمحسن

يسعد صباحك - الشاعر بدر بن عبدالمحسن

يسعد صباحك .. ليلنا تو ماجا
الشمس غابت واشرقت عندكم ... شمس
هى شمسنا اللي في جبينك تلاجا
والا قمرنا اللي فقدناه من امس
لليل السما برد وسحاب وعجاجا
يامن يشب النور .. في الخاطر العمس
انتى وانا لو كنا نتناجــا
لاماطفت في خاطري .. شمعه الهمس
يالى جرحتك ... مالجرحي علاجا
ادري الجروح النازفه تكره .. اللمس
بقول احبك .. وان عقدتى الحجاجا
!!اقولها ثنتين واربع مع خمس ..؟
ويسعد صباحك يابعد كل ماجا
ماراح من عمري .. وانا في رجا الشمس

نجمه ونهر - الشاعر بدر بن عبدالمحسن

نجمه ونهر - الشاعر بدر بن عبدالمحسن

لو حبت النجمه نهر .. وطاحت على صدره سنا

أن مرت الغيمة قهر .. وان هبت النسمة قهر
والى رمى طفلٍ حجر .. عكر مواعيد الهوى
انتي وانا نجمه ونهر .. وطالت مشاوير السهر
بينك وبيني الغيم ....
والشمس .. واغصان الشجر ..
وحكي العواذل والحذر ..
ولو رمي طفلٍ حجر .. عكر مواعيد الهوى
يابنت للنجمه سما .. وانا لي الوادي
ماختار في قربك ولا ... اختار في بعادي
امشي .. ولاودي .. لوتمسكي يدي
لااضيع فـ أمواج البحر .. ويفوت ميعادي
ان مرت الغيمه قهر .. وان هبت النسمه قهر
لو حبت النجمه نهر

سلمى - الشاعر بدر بن عبدالمحسن

سلمى - الشاعر بدر بن عبدالمحسن

اللـي طعنّي بين الاضـلاع وأدمى

هذاك نــدٍ لي ونعمـين فارس

ومن ينطح الوقت الردي قلبه أعمى

كم عامـرٍ خـلاه بالقاع دارس

يـابنت مـالي قلب بـالحب يرمى

كفي سهـام الفاتـرات النواعس

المـا عيـوني أظهـريني مـن المـا

وأنـا غريـق الدمع والريق يابس

ظميـان من مثلي من النـاس يظما؟

وأنـا علـى أحلى الينابيع حارس

والله يالـولا فيّـة عيـون سـلمى

ماشوف كل الناس ضاحك وعابس

مـن طـاب لي بالنـور ماني بظلمة

ومن جـادلي بالغيث مـاني بحابس

حسايف - الشاعر بدر بن عبدالمحسن

حسايف - الشاعر بدر بن عبدالمحسن

التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...
حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... عمرها ماجت على وقت الوعد ..
إلا ذاك اليوم ..
وعمرها .. مابكت .. وماضحكت ..
ماحكت له .. واسكتت
مثل ذاك اليوم ..
كانت اجمل من خياله .. كانت انظر ..
كانت اكثر .. من أماني عمره الظامي حنين ..
واختفت .. من كساها الليل باللون الحزين ..
اختفت في الطريق اللي معه..
كانت تجيه ..
كيف دربٍ جمعه معها .. خذاه..
ليتها اختارت سواه..
تزرع الفرقا لياليها .. عليه ..
وحسايف ... حسايف

ليل التجافي - الشاعر بدر بن عبدالمحسن

ليل التجافي - الشاعر بدر بن عبدالمحسن

آآه ... من ليل التجافي ... ماأطوله
ليلة العاشق ... ثوانيها ليال
من يقول الشمس باكر مقبله
كل شمسٍ مالها وجهك ....ظلال
بسألك باللي خذى منك الوله
وحطه اف صدري ... واعطاك الجمال
حاكني ... لجل الليالي ...الآوله
آه انا بموت من ذل ... السوآل
هو صحيح انك حبيبي اللي دله
واستوى ... عندك فراقي ... والوصال
كل جرحٍ غير ... جرحك بقبله
وكل ظلم ٍ ...غير ظلمك لي ... عدال

إلا الهوى - ابعتذر - الشاعر بدر بن عبدالمحسن

إلا الهوى - ابعتذر - الشاعر بدر بن عبدالمحسن

ابعتذر .. عن كل شئ ..
إلا الهوى ..ماللهوى عندى عذر..
ابعتذر ..عن أي شي ..
إلا الجراح ..ماللجراح إلاالصبر ..
إن ضايقك انى على بابك أكر ..
ليلة ألم.. واني على دربك مشيت عمري وأنا
قلبي القدم ...
ابعتذر ..ابعتذر ...كلي ندم ...
عن كل شئ .. إلا الهوى ..
ماللهوى عندي عذر ...
اتصدقي ...ماخترت أنا أحبك ..
ما احد يحب اللي يبي ..
سكنتي جروحي غصب ..
ياحبي المر..العذب ...
ليت الهوى وانتى ...كذب
كان اعتذرلك عن هواى ..
وماأقول أنا كوني معاي ..
ان ضايقك انى على بابك امر..
ليله ألم ...
وانى على دربك مشيت عمري وأنا ..
قلبي القدم ...
ابعتذر ..ابعتذر .. كلي ندم ..
عن كل شئ .. إلا الهوى ..
ماللهوى عندي عذر ..
الله كريم ..حبك ..يكون..
همي القديم ..
وجرحي القديم ...
والله عليم .. يا أحلي العيون ..
ان الفراق .. جزا الفراق ..
ابوعدك ..كان الطريق بيبعدك ..
بامشي بطريق ..
وكان الحجود بيسعدك ...
مالي رفيق ..
ابجمع اوراق السنين ..وأودعك..
كان الفراق اللي تبين ... الله معك

العمر أحبك - الشاعر بدر بن عبدالمحسن

العمر أحبك - الشاعر بدر بن عبدالمحسن

لليل أحبك .. مابقى في السما نور
والى ضواني الليل .. للصبح أحبك
واللحظة اللي كلها صد وغرور
اشوف قبري بين عينك وقلبك
في صدري اسراجٍ حزين ومكسور
رغم المطر والريح ... شلته افدربك
والله مابه غير لوعاتي قصور
وخوفي عليك الله ربي ..وربك
إلى متى ببني على صمتك جسور
لاحيرتني اسباب سلمك وحربك
العمر احبك... مابقي فينى شعور
ومتى جفاني العمر ... وشلون أحبك